Týsmorgunin varð Paul Watson leyslatin í Nuuk, eftir at danska løgmálaráðið noktaði at útflýggja hann til Japan. Morgunin eftir lendi hann í París, váttar sakførari hansara, Julie Stage.

Hon greiðir frá, at Watson fleyg til franska høvuðsstaðin, við privatflogfari, beinleiðis úr Nuuk.

Paul Watson sat varhaldsfongslaður í Grønlandi í nærum fimm mánaðir, eftir at hann varð handtikin í Nuuk 21. juli.

Síðani handtøkuna hevur Japan havt eitt ynski um, at fáa Watson útflýggjaðan og ákærdan, fyri eina hending í Antarktis í 2010. Tá skal Watson, sambært japansku myndugleikunum, hava gjørt skaða á eitt hvalaveiðuskip, og forðað japanskum hvalaveiðumonnum í at útinna sítt arbeiði. Ein av manningini fekk skaða, stendur í fráboðanini. Watson hevur noktað seg sekan.

Danska løgmálaráðið noktaði at útflýggja Watson til Japan, millum annað tí at ráðið ikki fekk neyðugu trygdina fyri, at tíðin, sum Paul Watson hevur verið varðhaldsfongslaður í Grønlandi, fór at verða trekt av møguligari fongsulsrevsing í Japan.

Paul Watson er altso aftur ein leysur maður, og búleikast nú í Fraklandi. 74-ára gamli aktivisturin er amerikanskur-kanadiskur ríkisborgari, men áðrenn hann varð varðhaldsfongslaður búði hann í Fraklandi, saman við konu síni og báðum synum teirra.