Eftir fimm umfør í Meistaradeildini hevur KÍ skorað 13 mál. Toppskorari við fýra málum er Patrik Johannesen. Í 6-1 heimasigrinum móti B68 leygarkvøldið skoraði hann fyrsta málið.

Stutt undan steðginum leygarkvøldið fór Patrik Johannesen skaddur av vøllinum. Nú er greitt, at 30 ára gamli álopsspælarin er langtíðarskaddur, og spurningurin er, um hann verður aftur at síggja á vøllinum í ár.

Í KÍ verður upplýst, at Patrik Johannesen sleit halsinini leygarkvøldið, og at hann í vikuni verður skurðviðgjørdur. Og so verður neyðugt við uppafturvenjing. Tað plaga at taka nógvar mánaðir at koma fyri seg eftir tílikan skaða.

Sambært FaroeSoccer hevur Patrik Johannesen spælt 160 dystir og skorað 65 mál í bestu landskappingini.