Nes kommuna hevur gjørt  avtalu við fyritøkuna, Falkon, um at gera átta grundstykki byggibúgvin. Talan er um átta stykki við nýggja partin av Høganesvegnum, sum Falkon júst hevur longt 180 metrar.

Talan er um fýra grundstykki til sethús í tveimum hæddum, og fýra grundstykki eru til sethús við einari hædd. Tey koma at liggja væl í lendinum við frálíkum útsýni.

Eftir ætlan verða grundstykkini liðug tíðliga næsta vár, men verða boðin til sølu, longu nú í novembur.

Prísurin verður 380.000 krónur fyri eitt grundstykki, og tá eru tey byggibúgvin.

Øll eru ikki heilt í somu stødd, men í miðal eru tey 500 fermetrar.

- Vit hava merkt at áhugi er fyri grundstykkjunum og so liggja tey væl fyri, við frálíkum útsýni, sigur borgarstjórin, Súni í Hjøllum

Ætlaninin er at hava eina talgilda søluskipan.

Grótið til longda Høganesvegin er fingið til vega úr lendinum oman fyri verandi veg. Grótið til sethúsagrundirnar verður eisini tikið haðani, so tað er stutt at flyta.

Oman fyri vegin verður so eitt 3-4000 fermetrar stórt grundøki, sum  komandi vár fer at verða boðið út til íbúðarbygging.Enn ber ikki til at siga nakað um kostnaðin, tí tað verður boðið út til fyritøkur, og tann, sum hevur besta uppskot, er tann sum verður tikin til uppgávuna at byggja íbúðirnar.