Ongi úrslit

Nú kapprennur KÍ við tíðina

Fram til týsdagin verður týdningarmikil partur av dagsskránni at fáa spælararnar at vera nóg væl fyri at fara undir enn eina europeiska uppgávu

Jóannes Hansen
1. august kl. 00:56

Hóskvøldið spældu bæði HB og KÍ í Europa Conference League.

HB tapti 1-0 í Brøndby og harvið er tað greitt, at leikluturin hjá HB í europeisku kappingunum er av á hesum sinni. Brøndby vann við samantalda málmuninum 2-1. Hetta var fyrsta ferðin, at André Olsen fór av vøllinum sum HB venjari uttan at hava vunnið úrtøku. Undan dystinum í Brøndby hevði hann vunnið seks og spælt tríggjar ferðir javnt.

Avrikið í Brøndby var so gott, at teir í HB eiga at vera væl nøgdir. 1-0 tapið er vónbrot, men marginalt tap hjá føroyskum felag ímóti einum at størstu feløgunum í Danmark bendir á, at føroyskur liðfótbóltur hevur flutt seg nógv.

Tað sást á gestunum í Klaksvík hóskvøldið – spælarum, áskoðarum og teimum kring liðið – at talan var um stórt vónbrot, tá ið tað var greitt, at FK Radnički 1923 úr Serbia hevði lagt rygg til 1-0 tap ímóti KÍ, sum nú fer at halda fram í Conference League.

Í Klaksvík kennast milliónirnar frá altjóða luttøkuni ivaleyst søtar, men í serbiska felagnum FK Radnički 1923 rakar tað heilt meint, at felagið ikki fær hesar umleið 3 milliónirnar í kassan.

Páll A. Klettskarð var einasti málskjútti, tá ið hann seks minuttir undan steðginum og við høvdinum sendi bóltin í málið eftir hornaspark frá Árna Frederiksberg. Nú hevur Páll A. Klettskarð skorað 12 mál í europeisku kappingunum. Tað er bara ein føroyskur spælari, sum hevur skorað fleiri mál í Europa. Tað er Árni Frederiksberg, sum hevur skorað 14 mál.

Týskvøldið fer KÍ í triðja umfari í Conference League at spæla á heimavølli ímóti Neman Grodno úr Hvítarusslandi. Tann dysturin verður á Tórsvølli. Hóskvøldið var talan um uppgerð, sum kravdi nógva styrki og orku av spælarunum. Eitt nú vóru vongverjarnir báðir – René Shaki Joensen og Jóannes Kalsø Danielsen – skiftir út. Teir vóru við í nærdystum, sum bóru við sær, at teir fleiri ferðir lógu at síggja til rættiliga viðtiknir á vøllinum.

Fram til týsdagin snýr tað seg hjá Magnusi Powell og hansara starvsliði um at fyrireika KÍ hópin til nýggju avbjóðingina, sum bíðar. Ein partur er at fáa spælararnar at vera birgar aftur, og ein annar er at fáa sinniliga yvirskotið framaftur og ein triði partur er at fyrireika taktiska uppleggið.

Í støðum, tá ið tað er stutt millum stóru avbjóðingarnar, kemur tað væl við, at tað eru skikkaðir avloysarar á beinkinum. Hóskvøldið vórðu Daniel Johansen, Mads Bo Mikkelsen og Claes Philip Kronberg skiftir inn, og á beinkinum sótu eisini aðrir, ið eiga royndir og eru væl skikkaðir at lyfta stóru uppgávuna.

 

KÍ – FK Radnički 1923 1-0 (1-0)

1-0: Páll A. Klettskarð 39.

KÍ samantaldur vinnari við málmuninum 1-0

KÍ: Sebastian Linnet John – Odmar Færø, Deni Pavlovic, Gaston Tellechea – Jóannes K. Danielsen (Claes Philip Kronberg, 89.), Hallur Hansson, Jákup B. Andreasen, René Shaki Joensen (Daniel Johansen, 83.) – Árni Frederiksberg, Páll A. Klettskarð, Patrik Johannesen (Mads Bo Mikkelsen, 83.)

Á beinkinum uttan at verða skiftir inn: Mark F. Jensen, Robert Williams, Filip Brattbakk, Dávid B. Andreasen, Páll Müller, Martin Gonzalez, Gilli Rólantsson Sørensen

Gult kort: Jákup B. Andreasen, Jóannes K. Danielsen

Venjari: Magnus Powell

 

 Brøndby IF – HB 1-0 (1-0)

1-0: Sho Fokuda 31.

Brøndby samantaldur vinnari við málmuninum 2-1

HB: Bjarti Vitalis Mørk - Ási Dam, Bartal Wardum, Klavs Kremens, Lassana Faye – Heðin Hansen (Mathias Voss, 71.), Noah Mneney, Sammy Skytte, Ári Mohr Jónsson (Heini Sørensen, 17.) – Emil G. Pedersen, Jonas Enkerud (Jákup L. Thomsen, 71.)

Á beinkinum uttan at verða skiftir inn: Reinis Reinholds, Viljormur Davidsen, Áki Johannesen, Dan í Soylu, Bartal Páll Klein, Ejvind R. Mouritsen, Silas Joensen, Jógvan í Skála

Gult kort: Bartal Wardum, Noah Mnenéy

Venjari: André Olsen

Mest lisið hesa vikuna

Skal ungdómurin eggjast at droyma kommersielt?

Í gjár kl. 23:43

Stolnir málningar á rótikassanum

28. august kl. 13:32

Tvær bygdir í Suðuroy fáa grind í dag

Í gjár kl. 16:39

Nú er neyðugt at verða serliga varin tá ið farið verður eftir nátungum

26. august kl. 12:15

Suðuroyartunnilin vendir Suðuroynna á høvdið

Í gjár kl. 10:12

Háaktuelt: Vilmund á veg til Rødbygaard – brot úr lívssøgu hansara

29. august kl. 14:18