Tað er nú greitt, at tað verður Annemi L. Joensen, sum skal standa á odda fyri nýggja eldraráðnum í Havn. Ráðið hevur skipað seg eftir valið nakað fyri jól, og har var úrslitið, at Annemi L. Joensen er vald til forkvinnu, og Leivur Hansen er næstformaður.

Bergljót av Skarði er skrivari, Marjun Poulsen er kassameistari, og Jóan Carl Dam er nevndarlimur.

Varalimir eru Marin Rasmussen, Lissi Hansen og Did Nicolajsen.

Høvuðsuppgávan hjá Eldraráðnum er at geva politikarum góð ráð og syrgja fyri, at atlit verða tikin fyri eldri borgarum, tá avgerðir verða tiknar.

Tilsamans 5.656 fólk høvdu valrætt til eldraráðsvalið, sum endaði 15. desember - men vallutøkan var 49,4 prosent.