Føroyar og Russland hava gjørt avtalu um sínámillum fiskiveiðirættindi fyri 2025.

Fiskimálaráðið sigur, at sum heild er kvotan eftir botnfiski í Barentshavinum munandi minkað og tí var eisini væntandi, at vit fóru at fáa lægri kvotur av av toski og hýsu í russiskum sjógvi næsta ár. 

Føroyska lækkingin verður tó eitt vet minni enn lækkingin í heildarkvotuni. Toskakvotan lækkar 23,8 prosent og hýsukvotan lækkar 4,5 prosent. Føroyska kvotan av flatfiski og rækjukvotan verða óbroyttar.

Føroysku kvoturnar í russiskum sjógvi í 2025 verða sostatt hesar: Toskur 7.445 tons, hýsa 1.000 tons, flatfiskur 900 tons og rækjur 4.000 tons. 

Seinastu árini hevur ein avmarking verið, at bara eitt føroyskt skip kann fara á norðaru leiðirnar í russiskum sjógvi at fiska rækjur.

Í nýggju avtaluni hava Føroyar fingið betri treytir á hesum øki soleiðis at næsta ár kunnu tvey skip vera til fiskiskap á norðaru leiðunum samstundis.

Russisku kvoturnar av makreli og norðhavssild í føroyskum sjógvi, lækka. Russiska makrelkvotan lækkar 34,3 prosent og kvotan av norðhavssild lækkar 10,6 prosent. Kvotan av svartkjafti verður óbroytt.

Russisku kvoturnar í føroyskum sjógvi í 2025 verða hesar: Svartkjaftur 75.000 tons, makrelur 8.080 tons og sild 5.800 tons.

Næsta ár fáa russisk skip atgongd til føroyskan sjógv at fiska í mesta lagi 52.612 tons av svartkjaftakvotuni, sum russisk skip hava í altjóða sjógvi, hetta er eitt sindur minni enn í ár.

Næsta ár hava russisk skip ikki atgongd at fiska í serøkinum hjá Føroyum og Bretlandi.