Tíðindafundur við Netanyahu var fyrr í dag.
Hann byrjaði við at siga, at hann var har fyri at punktera lygnirnar hjá Hamas.
- Okkara mál er ikki at hertaka Gaza, men at loysa tað frá Hamas, heldur hann fram.
Hann sigur eisini, at Ísrael fer at seta ætlanir í verk, um at hertaka Gazabýin og miðstaðarpartin av Gaza innan stutta tíð.
Fyrst fer Ísrael at seta á stovn trygdarøki. Har verður nógv til av mati, trygd og sjúkrarøkt, soleiðis at palestinska fólkið kann flyta, áðrenn Ísrael byrjar álopini.
- Okkara mál er at enda kríggið rættiliga skjótt, sigur forsætisráðharrin.
Vit ynskja, at fleiri altjóða journalistar koma inn í Gaza, sigur Netanyahu í svari uppá fyrispurning frá einum journalisti um, hví Ísrael ikki loyvir altjóða pressuni inn í Gaza.
Sambært honum skal avgerðin um at loyva fleiri journalistum inn, setast í verk innan næstu dagarnar.
- Vit vilja hava fólk at síggja, hvat hendir í Gaza og at síggja hjálparbilarnir, sum koma inn í Gaza.
Ísrael miðar móti tveimum virkjum hjá Hamas við nýggjum álopum
Hamas hevur noktað at avvápna, og tí hevur Ísrael einki annað val enn at gera arbeiðið liðugt og vinna á bólkinum, segði Netanyahu við tíðindafólk, og greiddi nærri frá ætlanum Ísraels.
Fyri at gera tað, skal ísraelski herurin næst rætta seg móti tí, sum hann lýsti sum tvey "eftirstandandi verndarvirki" hjá Hamas í enklavuni:
Gaza City og eitt landstrekki í miðstaðarøkinum í Gaza, sum fevnir um ymiskar flóttafólkalegur og al-Mawasi.
- Hetta er besti mátin at enda kríggið, og besti mátin at fáa enda á tí skjótt, metir Netanyahu eftir 22 mánaðar stríð.
Ísrael umhugsar allar møguleikar at sleppa gíslum leysum.
Sambært ísraelska forsætisráðharranum verða "kreativir hættir" at sleppa gíslum umrøddir, meðan Hamas verður burturbeint .
Hann segði eisini, at hernaðarrørslan Hamas framvegis hevur túsundtals vápnaðar yvirgangsmenn í Gaza, og at endamálið hjá teimum er at oyðileggja Ísrael.
Sambært Netanyahu hevur Ísrael loyvt nærum tveimum milliónum tonsum av hjálp inn í Gaza síðani kríggið byrjaði.
- Eg veit ikki um nakran annan her, sum hevur gjørt tað møguligt at veita so stóra hjálp til sivilfólkið í fíggindaøkinum.
Ísrael hevur fingið kritikk frá fleiri felagsskapum fyri at forða fyri hjálp til Gaza. Men ísraelski forsætisráðharrin heldur ikki, at kritikkurin er sakligur.
- Høvdu vit havt ein hungurspolitikk, hevði eingin í Gaza yvirlivað eftir tvey ár við kríggi. Men okkara politikkur hevur verið beint øvugt.
