Í morgin um tvær vikur fer Eyðun Klakstein landsliðsvenjari á tíðindafundi at boða frá, hvørjum spælarum hann fer at senda boð eftir at vera við á venjingarleguni, sum síðst í hesum mánaðinum verður í Sameindu Emirríkjunum.

Venjingarlegan verður í Dubai, og ætlanin er at spæla tveir landsdystir í Dubai. Tann fyrri verður hósdagin 26. mars móti Singapor, og tann seinni verður mánadagin 30. mars móti Sameindu Emirríkjunum.

Hetta er ætlanin, men nú fæst at síggja, hvussu tað verður. Í løtuni er støðan sera spent á arabisku hálvoynni, og tað ber við sær, at loftrúmið har á leið er stongt, og tí er tað eingin flúgving.

Tað eru meiri enn tríggjar vikur, áðrenn landsliðið fer úr Føroyum, so tað er møguleiki fyri broytingum og harvið, at støðan ikki verður so spent, sum hon nú er. Men um hon ikki broytist, so verður ikki møguleiki fyri at fara á ætlaðu venjingarleguna.