Tórshavnar býráð skal nú seta navn á tríggjar nýggjar vegir.

Í tí sambandi hevur Gøtunavnanevndin gjørt uppskot um, hvussu vegirnir skulu eita.

Ein av vegunum er vegurin við nýggju vinnustykkini á Ovara Hjalla. Í hesum sambandi mælti Gøtunavnanevndin til, at vegurin fær navnið »á Ovarahjalla«

Somuleiðis skuldi Gøtunavnanevndin finna nýtt navn til gøtuna frá Havnavegnum og oman til stórhøllina við Tjarnir. Gøtunavnanevndin mælir til, at vegurin fær navnið »Hallarvegur«

Og nú eru børnini hjá Beintu og kenda reiðaranum, Eiler Jacobsen, farin at útstykkja trøðna hjá foreldrunum við Marknagilsvegin.

Í tí sambandi skal ein gøta gerast og børnini hava skotið upp, at hon fær navnið »Beintugøta« ella »Beintulíð«.

Gøtunavnanevndin mælir til, at vegurin fær navnið »Beintulíð« Grundgevingin sigur, at hetta er í samsvari við, at fleiri vegir har um leiðir enda við »líð«.

Og nú skal Tórshavnar Býráð so taka støðu til, hvussu vegirnir skulu eita.