Tað var klassamunur, tá ið KÍ í kvøld vann 7-0 stórsigur á heimavølli ímóti B68. Hetta var fyrsti dystur í 18. umfari, og nú FM favorittarnir hava ein triðing eftir av heimligu kappingini – 9 dystir – er frástøðan aftur til NSÍ og HB 11 stig og betri málmunur. NSÍ fær sunnudagin vitjan av 07 Vestur, og HB fer sunnudagin at spæla á heimavølli ímóti EB/Streymi.
KÍ eigur útsettan dyst ímóti EB/Streymi, sum verður spældur mikudagin 24. september.
B68 er á sjeynda plássi við 18 stigum, og tað eru átta stig aftur til TB og níggju stig aftur til FC Suðuroy.
-Næstu ferð fáa vit vitjan av FC Suðuroy. Tá verður talan um lyklauppgerð fyri bæði feløgini. Eg sá FC Suðuroy spæla ímóti HB, sum vann 2-1 á Vágseiði. FC Suðuroy spældi væl, og teir í HB vóru hepnir at vinna øll stigini. Sunnudagin hittast TB og FC Suðuroy, og tá fær annað liðið trý stig ella kanska fáa tey eitt stig í part. Tað vil siga, at annað liðið og kanska bæði fara at nærkast okkum. Um vit skulu hugsa um at vinna á heimavølli ímóti FC Suðuroy, so skal avrikið vera væl betri, enn tað var í kvøld, og enn tað var sunnudagin, tá ið vit taptu á heimavølli ímóti NSÍ, sigur Jákup á Borg við FM1 útvarpið, og hann heldur fram:
-Vit tapa saman, og vit vinna saman. Eg havi høvuðsábyrgdina, og eg klikki ikki niður á spælararnar fyri, at teir ikki stríðast, tí tað gera teir. Teir vóru deyðatroyttir, tá ið dysturin í kvøld var liðugur. Men avrikið og úrslitið sigur, at tað eru fleiri lutir, sum ikki stemma soleiðis, sum vit vilja hava teir at gera, og tað fara vit at arbeiða við fram ímóti næsta vikuskifti. Tá ið tað er sagt, so mugu vit eisini staðfesta, at KÍ eigur at klassalið. KÍ spældi væl í kvøld, og vit vóru í flestu støðum langt frá teimum og hugdu at, sigur B68 venjarin.
Árni Frederiksberg varð undan dystarbyrjan valdur at vera besti spælari í juni og juli. Hann takkaði fyri við at skora tvey tey fyrstu málini. Tað fyrra var við tiltikna árnasparkinum, sum tað verður nevnt, tá ið Árni við hornasparki sendir bóltin beinleiðis í málið.
-Nú eru seks dagar, inntil vit fara at spæla í Ungarn. Tá ið vit eru so væl fyri, sum vit eru, so eiga vit væl og virðiliga at verða hvíldir, tá ið vit fara á vøllin í Ungarn. Um vit ikki vera tað, so eru vit ikki nóg væl fyri, staðfestir Árni Frederiksberg.
Millum ellivu teir fyrstu hjá KÍ í kvøld vóru fimm, sum ikki vóru millum teir fyrstu ellivu týskvøldið á Tórsvølli. Ein var Daniel Johansen, sum skoraði eitt mál og legði upp til tvey mál.
KÍ - B68 7-0 (4-0)
1-0: Árni Frederiksberg
2-0: Árni Frederiksberg
3-0: Filip Brattbakk
4-0: Gaston Nicolas Tellechea
5-0: Páll A. Klettskarð
6-0: Mads Bo Mikkelsen
7-0: Daniel Johansen
Dómari: Jákup Øssursson Mohr
KÍ: Mark F. Jensen – Jóannes K. Danielsen, Gilli Rólantsson Sørensen, Gaston Tellechea, Daniel Johansen – Árni Frederiksberg, Hallur Hansson, Martin Gonzalez, Filip Brattbakk – Páll A. Klettskarð, Patrik Johannesen
B68: Tórður Thomsen – Fríði í Túni Petersen, Aleksandur Ó. Jensen, Jákup N. Vilhelmsen, Fríði á Borg – Patrick Mensah, Tóki á Lógv – Emanuel Kulego, Sebastian Lau Nielsen, Karsten Clementsen – Jonathan Wembonyama
