Íslendsk uppsjóvarskip hava seinastu dagarnar fingið metstórar nøgdir av svartkjafti í føroyskum sjógvi í seinastuni9 Fleiri skip hava landað fullar lastir, og onnur eru á veg til lands við somu stórum mongdum. Íslendskir skiparar siga, at hetta er nakað av tí besta fiskiskapi, teir nakrantíð hava upplivað.

Tað veit íslendski miðilin Fiskifréttir at siga frá.

Fiskiskapurin hevur verið sunnanfyri og í einum útsynningi úr Føroyabanka. Tann góði fiskiskapurin bendir á, at nógv fiskur er í økinum, og at stovnurin er í góðum standi.

Stórar landingar og skjót úrslit

Fleiri skip hjá felagnum Síldarvinnslan hava fingið stórar lastir upp á stutta tíð. Barði NK landaði 2.100 tons mánakvøldið. Börkur NK fylgdi eftir við 3.200 tonsum, og Beitir NK varð væntaður við umleið 3.000 tonsum.

Samlað hava skipini hjá felagnum higartil í ár fiskað um 37.000 tons av svartkjafti. Umleið 22.000 tons eru eftir av kvotuni.

Fiskur spjaddur yvir stórt øki

Sambært einum skipara er fiskurin víða spjaddur í økinum. Tað gevur góðar fiskimøguleikar.

– Tað hevur gingið væl. Nógvur fiskur flytir seg gjøgnum økið. Vit fingu okkara veiðu í seks køstum, við togum upp á fýra til tólv tímar, sigur skiparin Þorkell Pétursson.

Hann sigur eisini, at skipini liggja spjadd, og at hetta vísir, at fiskurin er býttur yvir eitt stórt havøki.

Óvanliga høg framleiðsla

Eisini aðrir skiparar vísa á sera høgar fangstrátur. Skiparin á Börki, Hjörvar Hjálmarsson, sigur, at skipið varð fylt upp á sera stutta tíð.

– Vit fyltu skipið við fimm køstum upp á tveir og ein hálvan dag. Hvørt kast gav millum 450 og nærum 900 tons, sigur hann.

Hann leggur afturat, at hetta er óvanligt og bendir á ein sterkan stovn. Samstundis flytur fiskurin seg norðureftir inn í føroyskan sjógv.

Skiparin á Beitir lýsir eisini støðuna sum serliga góða.

– Vit vóru bert tveir dagar og sjey tímar á feltinum. Seks stutt køst góvu millum 300 og 650 tons hvørja ferð, sigur hann.

Hann sigur, at veðrið hevur verið gott, og at nógv skip hava verið í økinum.

– Eg havi ongantíð upplivað nakað líknandi. Manningin er sera væl nøgd, sigur hann.