Í fleiri ár búði Inger Smærup Sørensen í Føroyum, her hon eitt nú starvaðist sum listarligur leiðari á Listasavni Føroya. Nú hevur hon fingið bókmentaheiðursløn í Danmark.
Inger Smærup Sørensen kom í mars mánaði við fyrstu skaldsøguni, "Dødsbo", sum fekk sera góð ummæli í donskum miðlum. Og nú hevur Inger fingið debutantheiðurslønina frá Bodil og Jørgen Munch-Christensen.
Hetta er vird heiðursløn, sum á hvørjum ári verður latin tveimum rithøvundum undir 50 ár, ið hava givið fyrsta verkið út. Í ár fingu Inger Smærup Sørensen og Silas Toft heiðurslønir. Saman við heiðurslønunum fingu tey 50.000 krónur í part.
"Dødsbo" er skaldsøga um eina kvinnu, sum sigur arbeiðið upp, selur íbúðina og keypir eitt deyðsbúgv úti á landinum. Hon flytur inn í húsið, sum Elly átti, og vil liva eftir broyttu fortreytunum, nú veðurlagsbroytingar hótta. "Dødsbo" er ein søga um ein øðrvísi hátt at uppfata seg og heimin.
