Nú er gjørt av, at Hotel Hafnia og Hotel Brandan halda fram sum høvuðsstuðlar hjá Parasport Føroyum í ár.

Avtala um tað er skrivað undir fyrr í dag og er galdandi í eitt ár.

Hotel Hafnia hevur í longri tíð verið ein av høvuðsstuðlunum hjá Parasport Føroyum, og við nýggju avtaluni heldur samstarvið fram.

Avtalan er ein stuðul til arbeiðið hjá Parasport Føroyum at skapa fleiri møguleikar fyri, at fólk við breki kunnu íðka ítrótt og vera partur av ítróttarfelagsskapinum, sigur Parasport Føroyar í tíðindaskrivi.

– Tað hevur stóran týdning fyri okkara virksemi, sigur Petur Elias Petersen, formaður í Parasport Føroyum í skrivinum.

Parasport Føroyar arbeiðir út frá hugsjónini, at øll skulu hava møguleika at íðka ítrótt.

– Tað snýr seg um at skapa góðar karmar, so fólk, uttan mun til kropsligar førleikar ella menningartarn, kunnu vera virkin í ítrótti.