Vit her á dimmu fara at byrja ein fastan tátt har vit fáa ein fótbóltkønan at tippa um umførini í Meistaradeildini hjá monnum. Hesufer hava vit fingið Eli Hentze fyrrverandi hjálparvenjara á A landsliðinum at koma við einum boði uppá úrslitini av 2 umfariði av kappingini.

Hann tippar so:

Víkingur v B36 x

KÍ v NSÍ 1

HB v 07Vestur 1

EBS v AB 1

B68 v Skála x

Gleðiligt, at fótbólturin er farin á rull aftur!

Føroyski fótbóltsáskoðarin kann gleða seg til eitt fótbóltsríkt umfar í Meistaradeildini. 

Víkingur v B36

Fyrsti dysturin hetta umfarið er í Sarpugerði, tá árstalsfelagið úr Gundadali vitjar! Fótbóltsviðmerkjarar royna av øllum alvi at flyta B36 nærri oddinum, meðan skurarnir flúgva heldur lægri hesuferð. Heimavøllurin er søguliga stinnur, men vænti ein javnan dyst! 

KÍ v NSÍ

Størsti FM-biðilin KÍ hevur heimavøll móti harðasta kappingarneytanum í fjør NSÍ. Er ein frískur Brandur Olsen við á NSÍ liðnum økist møguleikin fyri einum úrsliti, ið ber stig við sær. Men á heimavølli tapir KÍ ikki – ella tað siga hatølini hesi síðstu árini! 

HB v 07 Vestur

Mest upplagdi sigurin er tó at finna í Gundadali, tá ið HB tekur ímóti 07Vestur! Vágamenn hava søguliga ilt við at fáa nakað burturúr, tá vitjað verður í høvuðsstaðnum. Og HB telist millum liðini, sum standa beint afturfyri kongabláu klaksvíkingarnar, tá ið gitast skal um, hvar gullkrónurnar fara at hanga við kappingarárslok, tó at sólin enn stendur lágt á himli, og tjøldrini lendu í gjár! 

B68 v Skála

Liðini, sum væntast at liggja frá miðjuni og niðureftir, hittast innanhýsis. Á Toftum er bert fjørðurin, sum skilir liðini, og hvørgin parturin fekk úrtøku í fyrsti umfari, tá ið skálamenn taptu tepurt á heimavølli móti HB, og B68 mátti lúta á Argjum. Á Toftum verður javnt! 

EB Streymur v AB

Og í Streymnesi vinnur heimaliðið móti AB! Sigfríður Clementsen og hansara menn hava í fleiri ár verið serstakliga dugnaligir at fáa ”neyðugu” stigini móti veruligu kappingarneytunum, og so her og har dugað at stolið molar frá onkrum av teimum meira vælbjargaðu!