Ferðin er skipað av Vinnuhúsinum í samstarvi við Uttanríkistænastuna og DI Suðurkorea. Endamálið er at styrkja sambondini millum føroyskt og suðurkoreanskt vinnulív og at skapa betri møguleikar fyri samstarvi og útflutningi.
Stórur marknaður fyri føroyskar fyritøkur
Suðurkorea verður mett sum ein týðandi marknaður, serstakliga fyri fiskavørur. Landið telist millum tey lond, sum eta mest fisk í heiminum per íbúgva.
Sambært Vinnuhúsinum røkka møguleikarnir tó longri enn matvørur. Tað eru eisini áhugaverdir møguleikar innan tøkni, skipasmíð, havnir og flutning.
Ein týðandi partur av skránni er altjóða matvørumessan Seoul Food Expo. Her fáa føroyskar fyritøkur høvi at hitta samstarvspartar og skipa fyri fundum við suðurkoreanskar fyritøkur.
Skrá við vitjanum og fundum
Ferðin fevnir um vitjan í bæði Seoul og Busan. Í Seoul er matvørumessan høvuðspunktið. Í Busan eru m.a. vitjanir á skipasmiðju og havn, umframt fundir innan fiskivinnu.
Ætlanin er eisini at skipa fyri fundum við viðkomandi vinnupørtum fyri at tryggja eina munagóða úrtøku fyri luttakarar.
Uttanríkis- og mentamálaráðið hevur váttað politiska luttøku. Ætlanin er, at eitt landsstýrisfólk skal standa á odda fyri ferðini. Endalig støða verður tikin, tá nýtt landsstýri er skipað.
