Í sambandi við Sameindu Tjóða World Clean-up Day luttók føroyska sendistovan í Ísrael nýliga í ársgongdu EU Beach Clean-up-átakinum, sum hesa ferð varð hildið á strondini í Rishon LeZion, sunnanfyri Tel Aviv.

Tiltakið varð skipað av sendiharranum hjá Evropeiska Samveldinum í Ísrael í samstarvi við umhvørvisfelagsskapin Zalul, sum arbeiðir fyri at verja og betra um hav- og strandumhvørvið í Ísrael.

Luttakarar vóru sendiharrar og umboð úr fleiri ES-londum, starvsfólk á sendistovum í Ísrael, skúlabørn og næmingar úr Young Diplomats-skránni. Øll hjálptu við at at savna rusk og burturkast á strondini og fingu samstundis høvi at skifta orð um, hvussu londini kunnu samstarva um grønar loysnir og betri umhvørvisvanar.