Føroysku U19-mennirnir greiddu sína skyldu og vunnu greitt, 33-17, móti Uruguay, eftir 13-7 til Føroyar í hálvleikinum. Føroyar kundu komið víðari til meginumfarið, um Føroyar vunnu stórt og Týskland tapti móti Slovenia, men soleiðis bleiv tað ikki, tí Týskland vann ímóti Slovenia.
Tað var eyðsýnt frá byrjan, at Føroyar vóru eitt betri lið enn Uruguay. Okkara settu seg á dystin frá byrjan og ráddi hjá leikarunum um at verða hugsavnaðir. Hetta gekk væl í verjuni saman við einum vælleikandi Inga Johannesen í føroyska málinum. Ingi tók meira enn helvtina av øllum skotunum, tíðina hann var á vøllinum. Álopið koyrdi eisini fyri so vítt væl, men vóru løtur har neyvleikin vantaði, nakrar tekniskar villur og brend skot. Føroyar øktu tó so líðandi og fóru til hálvleiks frammanfyri 13-7.
Føroyar øktu um leiðsluna í seinna hálvleiki, men tað var greitt at málmunurin fór ikki at røkka til at koma fram um Týskland. Venjararnir fingu allar leikararnir í spæl og tóku menn leikliga av. Filip Haldansen spældi ein góðan dyst á høgra bakki og gjørdist eisini føroyskur toppskjútt við 8 málum. Eisini kom Jógvan Andreas Lamhauge inn og stjórnaði føroyska álopinum væl. Føroyar vunnu stórsigur og endaliga úrslitið gjørdist 33-17 til Føroyar. Eftir dystin var føroyski málverjin, Ingi Johannesen, kosin besti leikari í dystinum. Ingi spældi góðar 40 minuttir av dystinum og tók heili 52% av skotunum.
Tá Týskland vann dystin móti Slovenia í dag er greitt, at Føroyar eru nr. 3 í bólkinum og skulu harvið spæla President´s Cup, sum er um 17. – 32 pláss í HM-endaspælinum. Fyrsti dystur í President´s Cup verður mánadagin. Allir dystir kunnu stroymast á youtubekanalini “IHF competitions”.
Dystargongdin Uruguay – Føroyar:
5 min. 1-3
10 min. 1-4
15 min. 4-6
20 min. 5-8
25 min. 7-10
30 min. 7-13
35 min. 9-16
40 min. 9-20
45 min. 11-21
50 min. 12-25
55 min. 15-29
60 min. 17-33
Málskjúttar hjá Føroyum:
Filip Haldansen 8
Rúnar Hammer 6
Jákup Egholm 5 (3)
Magnus Árason 3
Jógvan Andreas Lamhauge 3
William Napoleon Djurhuus 2
Helgi Jakob Halldórsson 2
Torkil Debes Dahl 2
Pauli Rasmussen 1
Erlingur Erlendsson 1
Málverjar:
Ingi Johannesen 11 bjargingar, 52%
Bjarni Gunnarsson Jakobsen, 2 bjargingar, 22%
