Klokkan 19 verður fyrsta bríksl í EM undankappingardystinum í kvinnuhondbólti millum Føroyar og Portugal í høllini við Tjarnir.

Dómarar eru Jaap Klompers og Koen Stobbe úr Niðurlondum.

Endaspælið verður í Pólandi, Rumenia, Slovakia, Kekkia og Turkalandi. Upprunaliga ætlanin var, at Russland eisini skuldi teljast millum vertirnar, men fyri meiri enn tveimum árum síðani avgjørdi EHF at útiloka Russland. Sum í so mongum øðrum altjóða viðurskiftum í hesum tíðum, so er tað russiska álopið á Ukraina, ið er orsøkin til, at Russland er útilokað.

Hini bæði liðini í bólkinum eru Ísland og Montenegro, sum í kvøld hittast í Hafnafirði.

Tvey tey fremstu liðini í bólkinum vinna seg beinleiðis í endaspælið, og bestu tríararnir vinna seg eisini í endaspælið. Tað kann væl vera, at ein av hesum tríarunum verður úr bólkinum, sum Føroyar eru í.

Føroyar hava spælt tveir dystir. Tann fyrri endaði við 24-22 sigri í Íslandi, og tann seinni endaði við 32-26 tapi á heimavølli móti Montenegro.

Í kvøld er Portugal gestur í høllini við Tjarnir, og sunnudagin fer føroyska liðið at royna seg í Portugal.