Gongdin er góð hjá Føroya Tele, bæði tá talan er um gjaldføri og rakstur, og samanumtikið stendur samtakið trygt á sterkum fíggjarligum undirstøði. Tað er niðurstøðan hjá samtaksnevndini í Føroya Tele, sum góðkendi roknskapin fyri 2025 á nevndarfundi fríggjadagin. Roknskapurin verður lagdur fram á aðalfundinum 13. mai 2026.
Ársúrslitið eftir skatt var 38,4 milliónir krónur, og tað er góðar fimm milliónir krónur meira enn í 2024, tá ið Føroya Tele hevði 33,1 milliónir krónur í avlopi eftir skatt. Sterka fíggjarstøðan og góða gongdin í gjaldføri og rakstri hava við sær, at nevndin mælir til at útluta eigaranum, Føroya Landsstýri, 50 milliónir krónur í vinningsbýti á aðalfundinum. Føroya Tele hevði 519,1 milliónir krónur í eginpeningi við árslok 2025.
– Nevndin fegnast um sera góðu gongdina hjá Føroya Tele, sum hevur ein týðandi leiklut í føroyskum fjarskifti. Samtakið skal bæði veita munagóðar tænastur og tryggja eitt haldgott undirstøðukervi, sum er grundarlagið undir talgildu menningini í Føroyum.
Bjarni Arnason, formaður í samtaksnevndini
Trygd og mótstøðuføri
Føroya Tele arbeiðir áhaldandi fyri, at føroyska fjarskiftiskervið er trygt og mótstøðuført, bæði tá talan er um innlendis kervið og sambandið við umheimin.
– Tað er okkara skylda at veita trygt fjarskifti við bestu loysnunum, sum finnast, so øll kunnu kenna seg trygg í talgilda samskiftinum á netinum. Samstundis skulu vit syrgja fyri, at Føroyar hava eitt nøktandi og trygt fjarskiftissamband við útheimin, sigur Kristian R. Davidsen, samtaksstjóri í Føroya Tele.
Hann vísir á, at hetta er ein týðandi uppgáva, sum starvsfólkini á Føroya Tele umsita vegna alt samfelagið.
– Dugnaligu og fakliga sterku starvsfólkini hjá Føroya Tele fylgja væl við tøknifrøðiligu menningini. Tey miðja áhaldandi eftir at veita kundunum bestu tænasturnar, og vit hava skipanir og starvsfólk, sum eru á varðhaldi, so føroyska samfelagið kann hava eitt so trygt fjarskiftiskervi, sum gjørligt.
Kristian R. Davidsen, samtaksstjóri
Føroya Tele heldur fram at arbeiða saman við myndugleikunum í royndunum at fáa eitt triðja kaðalsamband til útheimin. Alt farnetið hjá Føroya Tele er bygt á Ericsson-tøkni, og útbyggingin av fipurnetinum heldur fram. Við árslok 2025 var talið á fipurkaðlum tilsamans, sum eru lagdir út til kundar, komið upp á umleið 10.500.
– Føroya Tele heldur eina trygga kós, og tað eru góð útlit fyri, at samtakið fær eitt enn betri ársúrslit í 2026. Nevndin takkar stjórn og starvsfólkum fyri sera gott avrik, sigur Bjarni Arnason, nevndarformaður í Føroya Tele.
