Tennissamband Føroya og Havnar Tennisfelag eru farin undir eitt nýtt samstarv við pólska tennisvenjaran, Adam Zatrybowski.

Tennissambandið sigur í tíðindaskrivi, at í summar hevur Adam Zatrybowski verið ein virkin partur av menningararbeiðinum í tennissambandinum, og samstundis skipar hann eisini fyri venjingum fyri børnum og vaksin í Havnar Tennisfelag.

Tey siga, at Adam hevur drúgvar royndir sum venjari og hann er kendur fyri sítt heilhugaða og motiverandi arbeiði við leikarum á øllum stigum. 

Somuleiðis ber eisini til, hjá bæði royndum og óroyndum leikarum, at bíleggja tennistímar hjá Adam til persónliga venjing

– Samstarvið er ein týðandi partur av málinum hjá Tennissambandinum at styrkja bæði breiddina og menningina - og at skapa enn betri umstøður fyri bæði nýggjar og royndar tennisleikarar í Føroyum, sigur Tennissambandið.