Í 2023 var samrøðu gjørd við Heðin Zachariasen um fyrstu royndina við elbussum í Havn. Tveir elbussar vórðu settir í rakstur á leið 4 – ein ruta, sum varð vald, tí hon varð mett hóskandi til eina innleiðandi roynd við nýggju tøknini. Nú eru tvey ár gingin, og vit hava aftur tosa Heðin, fyri at spyrja, hvussu royndin hevur gingið.
– Vit byrjaðu við tveimum elbussum, tí tað var ynski frá kommununi. Leið 4 varð vald, tí bussarnir vóru framleiddir júst til hana. Alt var mált út frammanundan – stoppistøð, vegalongdir og forbrúk. So at vit kundu fáa eina so neyva tekniska mynd sum gjørligt, sigur Heðin Zachariasen.
Nú, tveir ár seinni, hava elbussarnir eisini verið royndir á øðrum leiðum – við góðum úrslitum, tó við avmarkingum.
– Vit kunnu staðfesta, at teir klára ikki at koyra eina heila vakt – frá klokkan 06 um morgunin til 23 um kvøldið. Teir klára leiðir, har ruturnar enda klokkan 17–18. Men tað riggar annars væl, og tað hevur víst seg, at leið 4 ikki er tann einasta, sum elbussarnir kunnu røkja, sigur Heðin
Ein av høvuðsspurningunum í 2023 var, hvussu føroyska veðurlagið – serliga kuldin – fór at ávirka battaríi. Tað vísir seg, at veðurlagið í Føroyum ikki hevur stóra ávirkan.
– Tað er øgiliga lítil munur á, um tað er vetur ella summar. Hetta er tí, at veðrið í Føroyum er so stabilt samanborið við eitt nú Noreg. Tá tað kemur til hita og kulda, so ávirkar tað ikki battaríið nevnivert, sigur Heðin.
Tó so er annað, sum ávirkar forbrúkið.
– Tá tað regnar og er nógvur vindur, brúkar man meira orku til at halda bussin heitan, og tí brúkar hann eisini meira streym. Tá hurðarnar latast upp og aftur í heilum, og rútarnir leggjast við døgg, so krevst meir upphiting.
Størsta óvissan er tó lívslongdin á battaríunum.
– Tað sum vit ikki vita enn, er hvussu leingi eitt battarí varir, áðrenn tað byrjar at vikna. Tað koyrir ikki líka langt uppá eina løðing nú, sum tá tað var nýtt. Tað vita vit við vissu, men hvussu nógv og hvussu skjótt tað fer at henda, tað vita vit ikki enn. Battaríini hava 7 ára garanti, men hvat tað kostar at skifta, hava vit ikki kannað enn, sigur Heðin.
Eftir tvey ár við elbussum, hevur Bussleiðin fingið greiðar royndir: Elbussarnir rigga væl, serliga á styttri leiðum, og veðurlagið í Føroyum hevur ikki havt stóra ávirkan á battaríini. Men teir klára ikki longu dagvaktirnar, og stór óvissa er framvegis um livitíð og skiftikostnaðin av battaríum.
Í sáttmálanum er avtala at tey skulu útvega fleiri elbussar í 2027, men fyrst skulu tey hava greiði á, hvussu væl battaríini halda.
