Luttakarar úr fleiri londum hava í tveir dagar arbeitt við at bøta um økið og gera tað meira atkomuligt fyri bæði vágbingar og vitjandi.

Luttakararnir komu úr Italia, Hong Kong, Írlandi, Kanada, Fraklandi og Føroyum. Teir hava m.a. gjørt rás, sett hegn upp, gjørt trappur, hampa um lendið, og sett borð, benkir og nýtt skelti upp á Vágseiðnum.

Nýtt skelti við kunning og korti

Nýggja skeltið gevur eina stutta frágreiðing um økið og vísir eitt kort. Kortið vísir rásir, útsýnisstaðir, gomlu neystaleivdirnar og leivdir eftir trábananum.

Closed for Maintenance er eitt ferðavinnuátak hjá Visit Faroe Islands. Verkætlanin í Vági tók støði í økinum við nýggju moldgoymsluni hjá kommununi, har arbeiðið eisini hevur til endamáls at endurskapa lendið til sítt natúrliga skap.

Arbeiðið liðugt og klárt til nýtslu

Arbeiðið er nú liðugt, og økið er opið fyri almenninginum. Vágbingar og vitjandi kunnu nú njóta Vágseiði frá einum nýggjum sjónarhorni. Samstundis hava luttakararnir eisini fingið høvi at uppliva staðbundnu náttúruna og mentanina undir uppihaldinum.

Mynd: Vágs Kommuna