Danski rockbólkurin Bloody Dice er í hesum døgum á konsertferð í Føroyum. Sangari í bólkinum er føroyingurin Dagfinn Joensen.

Bloody Dice hevur tríggjar konsertir næstu dagarnar. Hóskvøldið spæla teir í Dansistovuni í Sørvági, fríggjakvøldið í Blábar í Havn, og leygarkvøldið verða teir partur av stóra Tungt-tiltakinum í Salt á Tvøroyri, har fleiri rockbólkar luttaka.

Á konsertunum í Sørvági og í Havn spælir føroyski rockbólkurin Wolfgang eisini. Nýggja útgávan hjá Wolfgang kemur út fríggjadagin. 

Bloody Dice hevur tvær útgávur á baki, og teirra seinasta útgáva var kom í fjør.
Á konsertunum verður høvi at ogna sær fløgur og vinylplátur umframt t-shirts og ymiskt annað gott til tónleikasavn og klædnaskáp.