Dagurin í gjár var ein av teimum friðarligu hjá løgregluni.
Men seinnapartin í gjár varð ringt til løgregluna av eini matstovu í Havn, tí har var ein maður komin inn - at leggja seg at sova.
Løgreglan sigur, at tá ið hann varð purraður út, og skuldu fáast á dyr, bleiv hann illur í sær. Men tað hjálpti ikki nógv, tí úrslitið var, at løgreglan handtók hann og legði hann í brummuna at sova.
Tá ið hann varð sleptur út aftur, var tað við eini bót upp á 1.500 krónur í lummanum fyri at hava brotið skilhaldsreglurnar.
Annars hendi eitt ferðsluóhapp í Havn í gjár har tveir bilar stoyttu saman. Talan var ikki um fólkaskaða, og skrokkskaðin var lítil.
Men í hesum sambandi er tann eini bilførarin skuldsettur fyri at hava brotið sína treytaleysa víkiskyldu. Tað fer at kosta honum - minst - eitt klipp í koyrikortið. Men tá ið tað elvir til samanstoyt, at bilførari ikki heldur sína treytaleysa víkiskyldu, verður onkuntíð lagt upp til, at hann skal missa koyrikortið.
