Fyri sløkum tveimum vikum síðani kom eldur í eini hús á Tvøroyri og tey brendu mest sum í grund. Ein maður var staddur í húsunum, men hann bjargaði sær út í øllum góðum.

Síðani hevur løgreglan kanna orsøkina til eldsbrunan, og hana hava tey nú funnið.

Tey siga, at maðurin var í holt við at gera mat, men eldur var komin í grýtuna. tað eydnaðist honum at sløkkja eldin við at leggja lok á grýtuna. Men tá hevði tað longu fest í roykkápuna og í útsúgvingina og tað fekk hann ikki sløkt.

Og hóast bæði sløkkiliðið á Tvøroyri og í Vági royndu at basa eldinum, brunnu húsini mest sum í grund.