Tað bleiv bókin, Svørt Orkide, hjá Vónbjørt Vang, sum vann Lesaravirðislønina hjá teimum føroysku bókasøvnunum í ár.
Seinasta mánaðin hava lesarar kunnað atkvøtt ímillum tríggjar føroyskar bøkur, sum hava verið í uppskoti til at fáa Lesaravirðislønina hjá teimum føroysku bókasøvnunum.
Tey trý verkini, sum vóru í uppskoti í ár, vóru Svørt Orkide eftir Vónbjørt Vang, Altartalvan eftir Jógvan Isaksen og Marta Marta eftir Marjuna Syderbø Kjelnæs.
Og úrslitið var, at tað var Svørt Orkide, sum vann.
Kokkan 17 í morgin, mikudagin, verður Lesaravirðislønin handað á Landsbókasavninum.
Virðislønin er 30.000 krónur. Tiltakið er alment, umframt sjálva handanina verður eisini tónleikur, upplestur og okkurt lítið ábit.
Hetta er triðju ferð, at Lesaravirðislønin verður latin. Virðislønin er sett á stovn fyri at varpa ljós á tær føroysku bøkurnar, sum á hvørjum ári verða mest lántar og lisnar runt um á teimum føroysku bókasøvnunum.
Men endamálið er eisini at geva lesarunum eina rødd og geva teimum høvi til at fagna teimum bókunum, sum hava verið mest útlántar.
Tær bøkurnar, sum eru í uppskoti, eru tær, sum hagtølini hjá øllum føroysku fólkabókasøvnunum vísa, eru mest útlántar, umframt hagtøl hjá Landsbókasavninum.
