Týskland verður annað liðið í EM finaluni í manshondbólti. Tað er greitt, eftir at Týskland í kvøld vann hálvfinaluna móti Kroatia 31-28. Hálvleiksstøðan var 17-15 til Týskland.

Í fyrra hálvleiki gekk tað javnt á, inntil Týskland síðstu løtuna undan steðginum økti um leiðsluna.

Fyrstu løtuna eftir steðgin økti Týskland um leiðsluna til seks mál, og so lá tað í luftini, at Týskland fór at vinna.

Síðstu løtuna minkaði Kroatia um munin, men hann varð ongantíð minni enn trý mál.

Í finaluni sunnukvøldið fer Týskland at spæla móti vinnaranum av dystinum millum Danmark og Ísland, sum verður klokkan 19.30 í kvøld.

Fyrr í dag vann Portugal dystin um fimta plássið 36-35 móti Svøríki. Portugal skoraði sigursmálið í síðsta sekundi.