Tíðin upp undir jól er veitslutíð burtur av, og jólaborðhaldini eru longu byrjað.

Tað merkist eisini hjá løgregluni, tí tey siga í morgun, at tey hava havt nógv at gera - serliga av fullum fólki.

Tey hava koyrt fleiri full fólk heim og tey hava fingið fleiri full fólk á føtur aftur, sum ikki hava klárað seg sjálvi.

Løgreglan hevði so nógv at gera, at tey lukkaðust ikki at taka sær av øllum fráboðanum um full fólk, so í nøkrum førum máttu tey vegleiða tey, sum ringdu um, hvussu tey skuldu ber seg at.

Seint í gjárkvøldið varð ein bilur steðgaður, og tá ið viðurskiftini vórðu kannað, fann løgreglan eina lítla nøgd av hassji, 0,3 gramm, uppi á einum av fólkunum, og tað er viðkomandi skuldsettur fyri.

Í Havn varð eitt lítið ferðsluóhapp í nátt og tá ið løgreglan kom á staðið, vísti tað seg, at førarin var ikki edrúur, so hann er skuldsettur fyri at koyra ávirkaður.

Tíðliga í morgun varð aftur ein bilur steðgaður, og eisini hesin bilførarin varð skuldsettur fyri at koyra ávirkaður.

Løgreglan hevði eisini fatur í einum manni, sum ikki vildi siga hvør hann var, so tað er hann skuldsettur fyri.

Ein annar var so ringur at hava við at gera, at hann varð tikin við á støðina og settur í brummuna at vera í nátt. Hann er leyslatin aftur, men fær eina bót upp á 1.500 krónur fyri ólátaðan atburð.

Og so varð ein bilførari tikin fyri at koyra við ongum koyrikorti. Hann hevur mist tað einaferð, men hevur ikki fingið upp í lag at taka tað aftur. Tað fær hann mint 5.000 krónur í bót fyri, so tað er ein dýr søga.