Strandferðslan tekur nýggju upplýsingarnar um hekkuportrið á Galaxy í álvara.

Tað sigur Strandferðslan í almennari fráboðan í morgun.

Tað hevur verið nógv tos um Galaxy, eftir at skipið sigldi við hekkuportrinum upp á glopp tann eina túrin millum Havnina og Krambatanga.

Málið varð slept, men nú hevur maðurin, sum tók myndina, gjørt vart við seg alment. Tað sama hevur ein annar maður, sum eisini sá opna portrið.

Báðir høvdu heimild til at fara á biladekkið undir sigling.

– Upplýsingarnar, sum hesir nú koma við, verða tiknar í álvara, sigur Niels Juel Arge, stjóri á Strandferðsluni í fráboðanini.

Málið um hekkuportrið er áður blivið kannað av Sjóvinnustýrinum, sum gjørdi eina niðurstøðu og síðan slepti málinum aftur.

Tað hevur eisini verið frammi, at persónurin, ið tók myndina, hevur meldað málið til løgregluna.

– Strandferðslan væntar at frætta, um hon skal luttaka í framhaldsviðgerð av málinum, sigur stjórin.

Annars sigur hann, at hann harmast um, at viðkomandi, sum umvegis sítt starv hevur serliga atgongd til dekkið, ikki sigur manningini og Strandferðsluni frá, at hekkuportrið stendur á glopp ella er opið, tí so hevði málið alt fyri eitt kunnað blivið kannað, og møgulig prógv tryggjað.