Hesum londum kunnu Føroyar koma í bólk saman við, tá ið lutakast verður til Nations League seinni í dag

Í dag klokkan 17 verður lutakast til Nations League fótbóltskappingina, ið UEFA skipar fyri. Lutakastið verður í Brússel, har landsliðsvenjarin Eyðun Klakstein og onnur umboð fyri FSF eru til staðar. Spenningurin er sjálvandi stórur um, hvørji lond Føroyar koma í bólk saman við. 

Føroyar spæla í Deild C í Nations League, og lutakastið í dag skal avgera, hvussu teir fýra bólkarnir í Deild C skulu vera. Tey 16 londini, sum eru í Deild C, eru flokkað eftir úrslitum í undanfarnu Nations League kappingum. 

Styrkisbólkarnir í Deild C eru hesir:
Bólkur 1: Ísland, Albania, Montenegro, Kasakstan

Bólkur 2: Finnland, Slovakia, Bulgaria, Armenia

Bólkur 3: Hvítarussland, Føroyar, Kýpros, Estland

Bólkur 4: Lettland/Gibraltar, Luksemborg/Malta, Moldova, San Marino

(* Lettland-Gibraltar og Luksemborg-Malta spæla playoff dystir í mars fyri at avgera, hvøji av londunum skulu spæla í Deild C, og hvørji skulu spæla í Deild D)

Eitt land verður drigið úr hvørjum styrkisbólki at manna bólkarnar. 

Teir seks dystirnir í Nations League – tríggir heima og tríggir úti – verða spældir í september, oktober og november.