Sunnudagin 30. november, ið er 1. sunnudagur í advent, verður nýggja Ritualbók Føroya Kirkju I tikin í brúk.
Ritualbókin verður løgd fram undir gudstænastuni kl.11 í Havnar kirkju, dómkirkjuni, har biskupur og løgmaður eru til staðar. Steintóra Gleðisheygg Joensen, sóknarprestur, prædikar.
Í Ritualbókini er fyriskrivað, hvussu ymisku tænasturnar í fólkakirkjuni skulu skipast. Ritualbókin er ein av fýra bókum í fólkakirkjuni, sum Føroya løgmaður løggildir eftir tilmæli frá landsstýrisfólkinum í kirkjumálum og Føroya biskupi. Hinar bøkurnar eru Bíblian, Sálmabókin og Altarbókin.
Núverandi Ritualbók varð løggildað í 1930.
Nakað fyri og nakað eftir, at fólkakirkjan varð yvirtikin sum føroyskt sermál, hevur verið arbeitt við kirkjuligum bókum til gudstænastubrúks og kirkjuligar tænastur. Fimm bøkur eru komnar. Ritualbókin er tann sætta í røðini. Seinni í adventini kemur Ritualbók Føroya Kirkju III. Ta bókina setir biskupur í gildi Føroya kirkju til nýtslu.
Emil Olsen, stiftsprestur, hevur savnað, skipað og lagt tilfarið til rættis. Tvær ráðgevandi nevndir, ið biskupur hevur valt hava eisini arbeitt við tilfarinum: Liturginevnd 1 - mannað við Jónsveini Bech, Bergtóri H. Bjarkhamar, Anne Mette Greve Klemensen og Meinhardi Bjartalíð og liturginevnd 2 - mannað við Jonhardi Klettheyggj, Katrini Højsted, Ova Brim og Una Næs.
Forlagið Føroyskt Kirkjumál hevur staðið fyri at geva bøkurnar út. Føroyaprent hevur prentað.
Ritualbók Føroya Kirkju I kostar kr. 200,- og fæst til keyps á skrivstovuni hjá dómpróstinum, J. Paturssonargøtu 20, Tórshavn tlf. 312436.
