Í dag hevur Landsstýrið latið aðalskrivaranum í Heimshandilsfelagsskapinum, WTO, umsókn um sjálvstøðugan limaskap.

– Sostatt er hol sett á tilgongdina at fáa Føroyum sjálvstøðugan limaskap í hesum týdningarmikla, altjóða felagsskapi, sigur Sirið Stenberg, landsstýriskvinna í uttanlandsmálum.

Hon sigur, at talan er um eitt stórt stig fyri Føroyar, og tá ið komið verður á mál, fer tað at tryggja marknaðaratgongd fyri føroyskan útflutning á marknaðum um allan heim, sigur Sirið Stenberg.

Miðað verður eftir, at umsóknin verður viðgjørd á komandi WTO-ráðsfundinum í desembur, sigur hon.

– Eg havi eina vón um, at tað fer at bera til at koma á mál við hesum arbeiði innan trý ár, leggur Sirið Stenberg afturat.