Fyrsta juli vóru 19.718 húski í Føroyum. Tað er 111 fleiri enn við ársbyrjan.

Tað vísir ein uppgerð hjá Hagstovuni.

Í sama tíðarskeiði er fólkatalið vaksið 448 fólk.

Uppgerðin vísir eisini, at tann størsti bólkurin av húskjum, eru húski, har tað bara býr eitt fólk.

Tað er nevniliga í meiri enn í fjórða hvørjum húski, ella í 27 prosent av øllum húskjunum í landinum, at tað bara býr eitt fólk.

Hetta er eisini tann bólkurin, sum er vaksin mest hesi seinastu árini, tí hann er er vaksin heili 33 prosent upp á fá ár.

Næststørsti húskisbólkur, sum er næstan líka stórur, eru húski har tað bara búgva tvey vaksin. 

Fyrsta juli vóru tað 4.882 húski, har tað bara búgva tvey vaksin, sum svarar til ein fjórðing av øllum húskjunum. 

Hesir báðir húskisbólkar eru sostatt yvir helvtina av øllum húskjum.

Men sum heild vísir uppgerðin, at í tveimum triðingum av øllum húskjum í landinum, eru eingi børn.

Tað sæst eisini á myndini niðan fyri, at tað er bara í einum øki, at tað eru færri húski nú enn fyri einum ári síðani - og tað er í Suðuroy.

Á myndini niðan fyri er talið á húskjum fyri einum ári síðani, og høgrumegin er tali á húskjum í juli í ár.