Tað er stórur íslendskur fagnaður í Malmø, í sjónvarpsstovuni hjá RUV og kring alt Ísland og millum íslendingar – eisini í Føroyum.

Í dag hevur Ísland tryggjað sær pláss í EM hálvfinaluni, sum fríggjadagin verður í Boxen í Herning.

Í dag vann Ísland 39-31 móti Slovenia eftir hálvleiksstøðuna 18-16.

Hetta er fyrsta ferðin síðani 2010, at Ísland hevur vunnið seg í EM hálvfinaluna. Ta ferðina endaði tað við, at Ísland vann bronsu.

Í dag gekk tað javnt á, inntil fimm minuttir eftir steðgin, tá ið støðan var 20-19. Fimm minuttir seinni var støðan 25-20, og so var spurningurin bara, hvussu stórur íslendski sigurin fór at verða.

Um Ísland verður nummar eitt ella tvey í bólkinum valdast um, hvussu tað fer at ganga í hinum báðum dystunum. Tann fyrri verður klokkan 17 millum Kroatia og Ungarn, og tann seinni verður klokkan 19.30 millum Svøríki og Sveis.

Kroatia vinnur seg í hálvfinaluna, um tað eydnast at vinna móti Ungarn.

Møguleikin hjá Svøríki at spæla seg í hálvfinaluna er, at Ungarn fær stig móti Kroatia, og at Svøríki vinnur móti Sveis.