Á fundinum vórðu stovnsmetingar gjørdar av fleiri botnfiskastovnum í Norðvesturatlantshavi.
Havstovan skrivar á heimasíðuni, at arbeiðsbólkurin North Western Working Group (NWWG) arbeiðir undir ICES, sum er altjóða granskingarstovnurin fyri fiskastovnar í landnyrðingspartinum av Atlantshavinum. Á hesum fundinum vóru 20 serfrøðingar savnaðir á Havstovuni.
Helga Bára Mohr Vang, fiskifrøðingur á Havstovuni, hevur verið forkvinna í arbeiðsbólkinum síðani 2024. Hon segði seg vera fegna um, at Havstovan fekk møguleika at hýsa fundinum.
Tilmælini koma í juni
Á fundinum verða stovnsmetingar gjørdar við tilfari frá bæði rannsóknartúrum og fiskiskapi. Eftir fundin verður eitt uppskot til tilmæli gjøgnumgingið, áðrenn endaliga ICES-ráðgevingin verður latin úr hondum. Ráðgevingin fyri teir 19 fiskastovnarnar í hesum umfari verður almannakunngjørd um miðjan juni.
Undir fundinum kom ein fiskimaður inn á Havstovuna við einum toski, sum var merktur í Grønlandi og fiskaður við Ísland av einum føroyskum fiskifari. Hetta vakti stóran áhuga millum granskararnar, tí fiskurin gevur týdningarmiklar upplýsingar um ferðing hjá toski millum ymisk havøki.
