Seinnapartin leygardagin steðgaði løgreglan einum bili í Havn og tað kostaði bilføraranum eina bót upp á 1500 krónur, umframt eitt klipp í koyrikortið.

Tað vísti seg nevniliga, at hann hevði ov nógv fólk í bilinum - og tey vóru øll børn. Bilurin hevði trygdarbelti til førara og fýra ferðafólk, men har vóru fimm ferðafólk - fimm børn - í bilinum.

Og tað var ikki bara tað eina, sum var til avlops, sum ikki sat í trygdarbelti.

Eitt skifti var ivi um, antin bilførarin skuldi hava eina bót og eitt klipp fyri hvørt barnið, men málið varð so avgjørt við tað, at hann fær eitt klipp og eina bót.