Tað er møguleiki fyri, at Jóan Símun Edmundsson er á veg aftur í føroyskan fótbólt. Í fótbóltsumhvørvinum ljóðar, at HB tosar við spælaran, sum hevur spælt fleiri ferðir á føroyska landsliðnum enn nakar annar.
Í HB hava tey ongar viðmerkingar til søguna. Har verður søgan hvørki váttað ella avsannað.
Í fjør var norðmaðurin Emil G. Pedersen fremsti álopsspælarin hjá HB. Serliga eftir at André Olsen hevði avloyst Adolfo Sormani stóð norski álopsspælarin, sum skoraði 20 mál, sera sterkur í myndini.
HB venjarin André Olsen segði um vikuskiftið við dimma.fo, at teir í HB vilja fegnir hava Emil G. Pedersen at halda fram í felagnum, og at teir framvegis tosa mest sum dagliga við norska álopsspælaran. Emil G. Pedersen hevur givið til kennar, at hann hevur hug at royna seg í aðrari kapping.
Síðsta summar flutti Jóan Símun Edmundsson úr FC Shkupi í Norðurmakedonia og til KA á Akureyri í Íslandi. Sáttmálaskeiðið í Íslandi er liðugt, men tað hevur ljóðað, at møguleiki var fyri, at Jóan Símun fór at halda fram í Íslandi.
Nú vita góðar keldur í fótbóltsumhvørvinum at siga, at 34 ára gamli Jóan Símun Edmundsson og HB tosa saman um møguleikan fyri samstarvi og sáttmála. Jóan Símun Edmundsson hevur ikki spælt í Føroyum síðani í 2014, tá ið hann fyrst umboðaði AB og so HB.
Jóan Símun Edmundsson eigur metið fyri landsdystir. Hann hevur spælt 99 landsdystir og skorað átta mál.
