Floglíkindini hava verið serstakliga ólagalig hesa seinastu tíðina, tað hevur volt teimum á Atlantsflogi stórt høvuðbrýggj at fáa kabalina at ganga upp, tí at so nógvir túrar hava verið avlýstir.
Aftur í dag er flogferðslan ávirkað. Ein flúgvari til Keypmannahavnar slapp av stað tíðliga í morgun, men hinir báðir flúgvarnir, sum skuldi fara í dag, eru avlýstir. Annar skuldi til Keypmannahavnar, og hin skuldi til Billund.
Somuleiðis skuldu fýra flúgvarar koma í dag, tríggir úr Keypmannahavn og ein úr Billund, men teir eru eisini avlýstir.
Jóhanna á Bergi, stjóri í Atlantsflogi, sigur, at tað er ikki til at siga, hvussu verður við flúgvingini næstu dagarnar.
– Vit kunnu ikki annað enn at taka ein dag í senn og fyribils ætla vit at halda ferðaætlanina í morgin, so frægt sum vit kunnu, sigur hon - samstundis sum at øll tey, sum eru strandað í dag, eisini skulu fáast upp á pláss.
Tilsamans eru eini 900 - 1.000 ferðafólk ávirkað av veðrinum í dag, tí tey eru ikki sloppin á flog, sum ætlað, ella eru tey ikki komin fram, sum ætlað.
