Klokkan 17 verður fyrsta bríksl í Unity Arena í Fornebu eitt sindur vestanfyri miðbýin í Oslo.

Tað eru longu fleiri tímar síðani, at teir fleiri enn seks túsund føroysku áskoðararnir komu til Fornebu. Teir hava hildið til í hangari, sum er einar tíggju minuttir til gongu frá sjálvari høllini. Í hangarinum er nógv betri pláss fyri føroyingunum, enn tað var, har upphitningin var fríggjadagin.

Nú steyma føroysku áskoðararnir yvir í høllini, og lagið er gott, nú tað av álvara verður talt niður til dystin ímóti Montenegro.

Á høvuðsgøtuni í Oslo Karl Johan var tað fyrrapartin sum á ólavsøku. Har vóru nógvir føroyingar at síggja, og har hoyrdist nógv føroyskt prát.

Í dómkirkjuni vóru nógvir føroyingar til gudstænastu, og eisini í fríkirkjum í miðbýnum vóru fleiri føroyingar í morgun.