Gongst sum ætlað, fer Fíggjarnevndin hjá Løgtinginum- í hesi vikuni - at leggja uppskotið fyri Løgtingið um at projektera Suðuroyartunnilin og at bjóða arbeiðið út.

Síðani fer Løgtingið at viðgerða málið, og at atkvøða um tað.

Uppskotið, sum liggur í kortinum, er, at tunnilin skal ganga úr Djúpadali við Skarvanesi, til Sandvíkar.

Men ein privatur tunnilsbólkur hevur víst á eina aðra linjuføring, sum gongur undir Sandsbygd og umvegis Skúgvi.

Og á borgarafundi í Salt í kvøld, staðfesti Bárður á Steig Nielsen, formaður fyri Sambandsflokkin, at umboð fyri Sambandsflokkin fer at leggja eitt broytingaruppskot fyri Løgtingið um at uppskotið hjá privata tunnilsbólkinum um tunnilin undir Sandsbygd - og umvegis Skúgvi, skal eisini bjóðast út.

Sostatt fær Løgtingið tvær linjuføringar at taka støðu til. Men tað ljóðaði ikki sum um at umboðini fyri hinar flokkarnar taka undir við linjuføringini hjá privata tunnilsbólkinum.

Teitur Samuelsen, stjóri í Tunnilsfelagnum sigur, at tað kostar einar 25 milliónir um at projektera tunnilin og at bjóða hann út.

Skulu tvær linjuføringar bjóðast út, kostar tað 25 milliónir afturat.