Í løtuni ber til at síggja heimskenda sangleikin, Grease, í Mentanarhúsinum í Fuglafirði.

Tað er Sangleikabreytin fyri 10. floks næmingar, sum framføra hendan »spennandi, romantiska og stuttliga leik«, sum tey málbera seg. Og leikurin er týddur til føroyskt, so hann verður framførdur á føroyskum - við føroyskum ungdómum, sum syngja, dansa og spæla á pallinum - og arbeiða uppá ein bil frá 1975.  

Tey siga, at Grease hevur alt, ið ein sangleikur eigur at hava: góðan tónleik, sang, sjónleik og dans, og tað eru næmingarnir sjálvir, ið bæði spæla tónleikin og sum spæla sjónleik.

Tey siga í tíðindaskrivi, at leikurin er bæði fyri børn, ung og vaksin, tí leikritið er lagað til so at tað riggar í Føroyum og riggar til allar aldursbólkar.

Men søgugongdin er tann sama, og sangirnar munnu tey flestu kenna, hóast næmingarnir framføra teir á føroyskum.

Tað eru lærararnir, Bárður á Lakjuni og Marjun Djurhuus, ið hava Sangleikabreytina undir hond. Umleið 50 næmingar eru á breytini í ár, sum eru úr Fuglafjørði av Strondum skúla og úr Sundalagnum.

Seinasta sýningin verður 25. mars, men ongi atgongumerki eru eftir til fleiri av sýningunum.