Í gjár endaði hetta fótbóltsárið og í tí sambandi høvdu nógv fótbóltsfeløg eisini ársveitslu. Løgreglan sigur, at tað var rættiliga nógv fólk í býnum, men sum heild var tað stak friðarligt.

Løgreglan var vælmannað í býnum runt umkring í nátt og nakrar ferðir máttu tey leggja ímillum, har fólk komu til ilnar, men tað varð ikki til meiri enn tað.

Men í nátt varð ein maður kortini tikin tí hann var so ólátaður, at fólk høvdu ampa av honum.

Løgreglan sigur eisini, at tað flættaðist ikki við hann og tí varð hann tikin við á løgreglustøðina og lagdur í brummuna at sova.

Hann liggur hann framvegis nú klokkan níggju í morgun, men hann verður leyslatin aftur seinni. Men tá verður tað við eini bót upp á 1.500 krónur í lummanum fyri ikki at hava hildið skilhaldsreglurnar.