Kongaríkið Danmark hevur fríggjadagin undirskrivað avtalu við Kanada, um at styrkja um verjusamstarvið á fleiri økjum.

Tað skrivar Forsvaret í tíðindaskrivi.

- Vit hava brúk fyri okkara vinum, og vit deila kanadiska viljan at styrkja transatlantisku sambondini, og loysa framtíðar uppgávur saman, sigur Troels Lund Poulsen, danskur verjumálaráðharri.

Mynd: Av Facebook-vanganum hjá Sirið

Avtalan var undirskrivað á trygdarráðstevnuni í München, har Troels Lund Poulsen skrivaði undir avtaluna saman við Sirið Stenberg og Vivian Motzfeldt, grønlendsku uttanríkisráðharranum.

- Kanada er nærmasti granni hjá Grønlandi og ein tættur NATO-samstarvsfelagi. Tað er bara natúrligt, at vit styrkja samstarvið við okkara nærmasta samstarvsfelaga á verjuøkinum. Hetta er galdandi bæði tvílandað og innan karmarnar hjá NATO, sigur Vivian Motzfeldt.

Frá kanadiskari síðu er tað verjumálaráðharrin David J. McGuinty, sum hevur skrivað undir avtaluna.