Amnesty International í Føroyum skal nú hava ein nýggjan aðalskrivara, eftir at tað er greitt, at Katrin á Neystabø er farin í starv hjá ÍSF.
Katrin á Neystabø byrjaði í starvinum hjá ÍSF 1. september, har uppgávan er at "styrkja breiddina" í føroyskari ítrótt, og at virka fyri, at føroyingar hava eitt sunt og gott felagslív í ítrótti.
Talan er sostatt um broytingartíðir í Amnesty í Føroyum, tí hetta er fyrstu ferð í 11 ár, at Amnesty skal hava nýggjan aðalskrivara.
Umframt at virka við "vanliga" Amnesty arbeiðinum at skriva brøv til gagns fyri samvitskufangum í útlondum, hevur Amnesty eisini verið virkin innan landoddarnar seinastu árini. Úr rúgvuni kunnu nevnast átøkini Mynd krevur samtykki, Sex krevur samtykki, og arbeiðið fyri LGBT rættindum, kroppsligum rættindum og flóttafólkarættindum.