Ukrainski forsetin, Volodymyr Zelensky, luttók fyrr í kvøld í einum pallborðskjaki á trygdarráðstevnuni í München.

Her upplýsir hann, at hvørki hann ella ukrainska fólkið kunnu góðtaka, um avgerðir verða tiknar um kríggið í Ukraina uttan at Ukraina er við.

- Tað er ikki eitt gott hugskot, og eg vóni, at Trump forseti ikki hevur tað hugskotið, sigur hann um samráðingarnar við Putin uttan Evropa ella Ukraina.

Zelensky, forseti, er spurdur, um hann fer at luttaka í samráðingum við russisk umboð á komandi vitjan í Saudi Arabia.

Hann sigur, at endamálið við ferðini er samrøður við lokalar samstarvsfelagar, sum kunnu føra til, at ukrainsk børn, sum eru rænd til Russlands, verða leyslatin.

- Eg vil ikki møtast við ymiskum russarum. Eg vil bara hitta ein russara: Putin. Og tað fer bert at henda, tá vit hava eina felags ætlan við Trump og Evropa. Tá fara vit at seta okkum saman við Putin og steðga krígnum.