Siðið Stenberg, landsstýriskvinna í uttanlandsmálum, vil hava víðari heimildir til at seta tiltøk í verk ímóti Russlandi og Hvítarusslandi.
Tí hevur hon lagt uppskot fyri Løgtingið um at samykkja tað.
Hon vísir á, at illgruni er um, at russisk fiskiskip eisini fremja ymiskt ólógligt virksemi og í kjalarvørrinum av tí, hevur ES sett tiltøk í verk móti persónum og skipum, sum eru undir illgruna fyri at bróta grundleggjandi mannarættindi og fyri at gera seg inn á samskiftiskaðalar, og annað.
Tað er serliga hetta, sum er viðkomandi fyri Føroyar, tí tvey russisk feløg, Murman SeaFood og Norebo JSC, sum hava fiskiloyvi í føroyskum sjógvi, eru ímillum tey, sum eru undir illgruna fyri at gera seg inn á samskiftiskaðalar, og annað, sigur landsstýriskvinnan.
Hon vísir á, at hóast hesi bæði feløgini eisini hava fiskiloyvi í norskum sjógvi, sleppa skip hjá teimum ikki longur í norskar havnir ella inn um 12 fjórðingar, og tey fáa heldur ikki fiskiloyvi frá norsku myndugleikunum.
Og nú vil Sirið Stenberg eisini hava heimild at nokta teimum, og øðrum illgrunasomum skipum, at koma til Føroya at fiska, og í føroyska havn.
Landsstýriskvinnan sigur, at hetta útihýsir ikki í at fiskiveiðusamstarvið millum Føroyar og Russland kann halda fram - um so er at báðir partar vilja tað.
Tey ásanna kortini, at hetta kann fáa avleiðingar fyri okkara útflutning av fiskavørum til Russlands og fyri okkara fiskiveiðisamstarv við Russland.
Sirið Stenberg ásannar nevniliga, at verða tiltøk sett í verk, kann ikki útihýsast, at Russland eisini fer at seta tiltøk í verk ímóti Føroyum og tað kann eisini verða, at hugurin hjá Russlandi at halda fram við fiskivinnusamstarvinum við Føroyar minkar.
Hon sigur, at umboðini fyri vinnuna halda ikki, at Føroyar eiga ikki at seta tiltøk í verk, hóast bæði ES og Noreg hava gjørt tað.
Tað er tí at vinnan óttast fyri, at nýggju avmarkingarnar kunnu føra til, at áhugin hjá Russlandi at gera fiskiveiðiavtalu fyri 2026 minkar.
Somuleiðis er heldur ikki óhugsandi, at heldur fiskiveiðisamstarvið fram, verður talan um eina verri avtalu enn hana, sum vit hava í løtuni.
Í hesum sambandi vísir vinnan á, hvussu stóran týdning, føroyski fiskiskapurin í Barentshavinum, hevur.
