Í amerikanska býnum Philadelphia hava ótangar gjørt seg inn á eina yvir tveir metra høga víkingastandmynd úr bronsu, og koppað hana út í ánna Schuylkill River, skrivar NCB-stjónvarpsstøðin á netinum.
Talan er um eina standmynd av íslendska landnámsmanninum, Torfinn Kallsevni, sum hevur staðið við Schuylkill áarbakkan í nærum eina øld.
Tað var seinnapartin í gjár, at løgreglan fekk fráboðan um, at standmyndin var burtur. Tá varð beinanvegin staðfest, at Torfinnur varð koppaður og skumpaður niður í gruggutu ánna.
Torfinnur Kallsevni var íslendskur rannsóknarfari, sum settist niður Norðuramerika í 1010 stutt eftir at Leivur Eiriksson hevði funnið Vínland. Standmyndin av Torfinni hevur staðið í við Schuylkill ánna síðan 1920.
Froskmenn kundu skjótt staðfesta, at standmyndin lá í ánni, og ein krani varð kallaður og Thorfinnur fingin upp á turt aftur. Men hann var høvuðleysur, men eisini høvdið varð bjargað upp úr ánni.
Íslendski listamaðurin Einar Jónsson evnaði standmyndina í 1918, og hon varð reist tvey ár seinni í Fairmount Park í Philadelphia har fleiri aðrar standmyndir eisini standa. Ein tilsvarandi standmynd stendur eisini í Reykjavík.
Standmyndin av Thorfinni Kallsevni í Philadelphia hevur stundum verið savningarstað fyri mótmælum hjá hvítum nationalistum í sambandi við dag Leivs Eirikssonar 9. oktober. Standmyndin hevur eisini upplivað herverk áður, eitt nú við máling.
Á heimasíðuni hjá NBC sæst filmur frá bjargingini av standmyndini
.jpg)
Bronsustandmyndin hjá Einari Jónssyni av Torfinni Kallsevni hevur staðið við áarbakkan í Philadelphia síðan 1920 (Savnsmynd)
