Frá vónloysi til ekstasu upp á ein minutt.
Móti endanum av dystinum í áttandapartsfinaluni mánadagin, tá Sveis og Frakland hittust, sóu vit myndir av einum mótfalnum og næstan grátandi sveisiskum viðhaldsmanni, tá støðan var 3-2 til fransmenn.
Men tá ið Sveis stutt eftir javnaði til 3-3, vóru bæði troyggja og hattur skrætt vekk, og tann mótfalni maðurin sá nú út sum ein annar krígsmaður, ið var til reiðar at fara í kríggj.
Síðani mánadagin eru myndirnar av Luca Loutenbach farnar víða um á alnótini, og nú halda ymiskar fyritøkur, at eldhugaði viðhaldsmaðurin skal fáa løn fyri sín innsats.
Tjóðarflogfelagið í Sveis hevur syrgt fyri, at Luca Loutenbach er sloppin til Sankta Pætursborg, so hann kann sleppa at síggja dystin millum Sveis og Spania í kvøld.
Og sum um, at tað ikki var nokk, so hevur almenna ferðaskrivstovan í Sveis eisini bjóðað sveisiska viðhaldsmanninum eina uttanlandsferð eftir EM, so hann kann slappa av, eftir at hava verið gjøgnum alt kensluraðið seinastu vikurnar.
Í fjórðingsfinaluni í kvøld tapti Sveis fyri Spania upp á brotssparkskapping.
