Fyri triðju ferð í tvær vikur hevur Dánjal Dahl Ljósheim bøtt um eitt føroyskt met. Hesa ferð var tað til innandurakapping í Atleticum í Malmø í gjár, at hann bøtti um føroyska metið á 200 metra teininum.
Tað skrivar heimasíðan hjá Hvirluni.
Heimasíðan skrivar, at fyrimunurin hjá Dánjali er, at hann venur eina ferð um vikuna í júst hesi høllini, tí høllin, sum Sparta eigur í Keypmannahavn, ikki er nøktandi til venjing í løtuni.
Fyrradagin rann Dánjal seg til nýtt føroyskt met á 400 metra teininum, sum enn sat tungt í beinunum í gjár. Tí hitaði hann leingi upp, og tað vísti seg at loysa upp, tá hann skuldi renna.
Hann kom væl upp í toppferð, og helt ferðina væl allar 200 metrarnar. Tíðin var somikið góð, at hann rann seg inn á eitt samlað triðja pláss hjá teimum vaksnu í kappingini í gjár.
Hvirlan.fo skrivar, at málið hjá Dánjali var at bøta um føroyska metið, og tað megnaði hann, tí klokkan á málinum segði 23,12 sek, sum er 0,13 sek skjótari enn hann rann, tá hann tók metið fyri tveimum vikum síðan.
Her er eitt videobrot frá kappingini í gjár, tá hann bøtti um føroyska metið á 200 metrum:
