Leygarkvøldið varð ein maður meldaður fyri at hótta fólk á einum hotelli í Havn.

Løgreglan sigur, at hóttarnirnar vóru av slíkum slagi, at tey gjørdu av at fara eftir manninum og at handtaka hann.

Talan er um ein útlending, og hann varð settur í brummuna. Løgreglan sigur, at hóttanirnar vóru so mikið álvarsligar, at støða varð tikin til at føra mannin fyri rættin í gjár við kravi um at hann skuldi varðhaldsfongslast.

Tað var dómarin í Føroya rætti samdur í, og sostatt varð maðurin varðhaldsfongslaður í tvær vikur.

Hesar báðar vikurnar skal løgreglan so brúka til at lýsa málið til fulnar og gera tað klárt til endaliga viðgerð í rættinum.

Tað er ikki greitt, í hvørjum ørindum útlendingum var her, men hann var ikki her í arbeiðsørindum.

Verður hann dømdur, kann hann eisini vænta at verða vístur av landinum í eitt áramál, ella kanska alt lívið.